2007年3月16日星期五

我信別人不信的人

年初六約了倉海君一干人等去狂人家拜年。
是次本大爺第一次涉足北角,正所謂 : 「出遠門做足準備」 :

早上 : 偷偷潛入弟弟房,鼠上佢張床,sa 走佢部手提電話後極速上班。
回到公司 : 立即check 放工那部廠車是去北角...「M5 .. ok ,收到。」
放工 : 捕在打咭機旁,夠鐘...立即打咭鬆人閃上車,瑟縮一角免被發現等開車。 轟...終於成功踏上征途啦,拿拿聲打比首領報告軍情後,便大安旨意地在車上看風景。
出事過程:
正當廠車穿越過海隧道時,腦裡突然「叮」一聲...「弊 ! 領0野,唔記得左究竟係邊個站落車..><"」港島區...我 only 認得中環、灣仔 & 銅鑼灣 only,北角...咩樣架?!!
OMG...立時環顧四周,死得,冇個同事係識既 ?! 心想冇[奶油]係個位度嗌上司機位 :「請問北角站0係邊」咁樣衰架...好不容易終瞄到個我比較熟的同事坐在我的背後,立即捉實她求救,不幸地她是在第一個站落車,也不知北角是第幾個站 !!! 好彩坐在我隔鄰既女同事聽到我們的對話,好心地給我指點迷津,總算能安全抵壘。
我這隻小羔羊腳踏實地後,即刻再打比首領意欲會合,怎料,出事啦 : 「你的電話餘額不足」
唔係掛,咁大鑊。舉目四周都冇電話亭喎,又唔好意思向路人借電話,唯有咋咋臨走去找酒家借電話。
第一間,個格局好高級啊,未入到去已有個知客姐姐企定定在門口係咁啤住你,好驚,即閃。
行到街尾,有第二間,嗯 ! 比較平民兼多人,我借電話都應該冇咁礙眼。於是靜雞雞咁逛了全場一圈扮找人...打擊呀,竟然沒有一角是讓客人打電話的呀,有冇搞錯呀,間酒家咁孤寒架,新界大部份茶樓都有電話角架喎,港島區d電話費係咪貴d架 ??!! 沮喪的我唯有死死氣地行去 cashier 到,鼓起最大既勇氣問個姐姐仔借電話打比首領求救。要命的是,他竟然還未到達現場,叫我自己找狂人。
噢...好慘呀,我焗住拿出那個只有外表的電話去記下狂人的電話號碼,在姐姐仔的電眼掃瞄下打比狂人先生救命,不知何解他對我咁有信心 : 都話左比佢聽我的情況及我係路癡黎架,佢竟然仲夠膽叫我一個人行一條街過去xx酒店和他會合,好啦,既然佢咁有信心,就信佢啦 ~(因他實在太長氣而唔到題,而一股怪異的氣氛又在我身邊漫延,姐姐仔一定在心裡咒罵緊我啦,有手提仲要借她的電話 ?! 我現在的情況實在和那些「賓賓」何其相似 !!!)在這種無形壓力下,我但求救快快收線逃離現場,唯有答應他去展開我的冒險之旅。

首先去到大街,確定自己的位置,直行了一段路...
e...還未到喎,思想掙扎開始了 : 該不該開口向路人問路呢 ?
環望四周,好像沒有一個可靠的人啊~心裡又擔心人家會以為我是那些電郵騙徒,怎辦 ?
適時,有一名警察先生迎面而來,很想向他問路但又驚他以為我是「自由行」而在大庭廣眾下check我身份證 or 在我截停他時以為我擊警而向我舉槍時點算,嘩...太樣衰喇,就係咁在思想掙扎期間便白白讓他在我身邊擦過。咁我唯有認命地繼續向前走,只是左望了一眼,右望了一眼之麻,就係咁連酒店的名字也忘記了。
好想打電話求救啊~但沿途都沒有酒家呢 ! 就這樣一直左望右望地向前行了不知多久,(心裡不斷咒罵狂人,又話間酒店在大街,直行便很容易找到既,騙人的啊~北角真的很大啊~) 突然好像有仙人指路般,我瞄到對面街的後面,好像隱約透出「酒店」這兩隻字,噢~立即後退去尋找這間傳說中的酒店。九曲十三彎地橫過幾條馬路,我終於到達「目的地」喇~ e...但何解一個熟悉的身影都冇既,莫非真的迷路了 ?!
在酒店大堂有不少旅客在等待,好不容易找到一個類似電話的物體,飛撲過去...唔係掛...竟然打唔出 ?! 在酒店門外徘徊了一會,真的不是辦法啊~ 唯有硬著頭皮再衝入去確定了它真的只是一個內線電話...打擊呀~
當機立斷的我,立即撤離酒店,走過隔鄰的便利店找電話打,命運又一次玩弄我啦...內裡兩部電話都是壞的,我只能再次出走,開始「尋找電話亭」的故事...
轉出便利店,街角的 有個 pccw 的電話亭,我出盡奶力去拉開那扇鬼打門,我頂,都是壞的,怎麼辦啊~已經 7:30 pm 了迷路超過半小時,我應否打道回府呢 ?

(待續)

3 則留言:

林時拉夫斯基 說...

你呢篇文o既下集點解咁耐都未出o既?

我都係路痴,試過開學時搵唔到間學校,搞到要著住校服周街問人我間學校點去;又試過跑cross-country的時候認錯路,結果用多左一倍時間先返到終點,跟住俾教練罰跑多一次;至於落錯車、認錯路呢d事件,就更加係家常便飯啦。

過路貓小姐 說...

um....
我都覺得自己個下集有d耐,但冇辨法,近期發生太多事兼有太多誘惑喇...呵呵呵
其實我已加快速度0架啦(下集都已draft左半篇在電腦)應該不用3年零8個月才完成0既...呵呵呵~

e..原來你都係路痴0黎0架 (真係睇唔出),呵呵..咁就好喇~
下次再有人「損」我的認路才能時,我可大模斯樣咁擺你上檯囉..呵呵呵~~

paulsin 說...

貓小姐,剛剛發現,你竟然膽敢公然在網上損我名聲!不過你唔講,大家都應該估到我長氣。我唯有罰你拿拿聲寫埋下集!等大家知道,我信你,無非 Self-Fulfilling,結果都唔算太壞吖 :)