2007年1月23日星期二

我的「懷念水」

睇完倉生的「懷念水」,也來湊熱鬧學人抒發0下..

正經八百的哪些我不懂寫,例如 :人體構造有幾多 % 係水...水既典故...等等
我寫的只是我的「懷念」。

對於「水」我又愛又恨,不過用它來形容自己都適合。
平常時,我係一杯室溫的清水,無色無味存在都唔多覺,冇乜威脅性 (當然,你加鹽落我度時,我會係一杯咸水 ; 加糖時我會係一杯糖水。)
面對熟悉的朋友或興奮時,我會係稍微加熱既暖水 ;
面對不熟悉的朋友或不感興趣的事時,我會係雪了一陣的凍水 ...
[警告 : 請閣下小心控制溫度,不然我可能會因過熱而變成滾水或過冷成冰,而誤傷閣下!]
大多的時候,我係被生活蒸發掉的水蒸氣,升上天上的一舊雲或天性關係而長期潛水的深海海水。

我對水的愛恨記憶

幼稚園時代

幼兒的我是住在木屋,每當下雨天都會漏水,每次祖母餵我和弟弟食豉油撈飯時,我們就會望著雨水不斷滴進廳中的2隻膠桶當娛樂又或坐在門庭前看雨過日辰。少不更事的我,是沒有少年維特煩惱的,唯一覺得惱人的,就只算是雨水打落鐵皮屋頂時,滴滴答答的吵著人家睡覺。冬天情況還好,起碼可以大被過頭,夏天便很慘,要輾轉一段長時間才能入睡,幸當時年少,捱一兩晚通宵都仍龍精虎猛。

下雨期間,返學的路上都會水浸,祖母會揹著弟弟和夾著我去上學,以免我們弄濕鞋襪,但事實係每次都失敗兼我每次都好痛...(都唔明點解次次都係我比人夾著在腋窩下既..><) 終於有一次,我就在濕滑的走廊上跣跌落大坑渠,爬不上來地面。祖母為怕我遲到,夾硬單手揪我上來送校,她再回家取過套新的校服給我替換,結果我就這樣又濕又髒的一個人在校長室等她回來。 我不知道我常看醫生的記憶是否關這次意外事,總之我的幼兒記憶就是跌落坑渠->看醫生->浸「灰孟水」...

誰說小孩子都喜歡玩水架 ? 我就是由幼稚園開始討厭水。

下午班的小學時期

每天我都是在家吃過午飯才上學,每天我都會被祖母罵我是「駱駝」...足足被罵了6 年直至小學畢業。究其原因都只有一個,就是我討厭喝水 (不論是湯水、糖水還是汽水) ,更甚是每天她安排給我回校的一支300ml樽裝水,都只被我喝了一口便全數拿去淋花或原封不動地拿回家。我也不知道我是怎樣存活過來的。直至有一次,我不只討厭水咁簡單,直頭係忌水...

話說某年夏天,我們一家和舅父一家去了屯門的蝴蝶灣游水,不知是否那個年代的男人都是癡架,正當我係度享受緊條美味的腸仔時,我舅父夠膽死無啦啦走黎捉住我,噗通一聲就咁將我掉落海,話浸浸0下就會識游水架啦,佢都係咁學之麻,然後自己游左去...不用我多講,聰明的閣下都估到我的下場了...
沒錯...很快我便沒頂了...勁咸的海水充斥著我的眼耳口鼻喉嚨,正當我以為我快死了的時候,我舅父才像捉雞仔般一手執番我上岸,還要責怪我冇鬼用,多得佢英明神武咁發現我咁鬼耐都唔浮番上水面,只見我在水底手腳「燦燦」...(下刪幾百字)...就係咁..我就開始忌水喇....

中學年代初

自那次遇溺事件後,便一直沒再去游水,但命運不是由你我可以控制的。
初中時,我那間鬼打Band 1 中學的體育堂,除了一般的打波跑步,好景不常地,竟還有急救、跳舞和游水...鬼整佢學校本身既然都冇泳池,就應該作罷啦,竟要勞師動眾跨區 book 公共泳池..
好無奈,當年的我係一個超乖既模範學生,so 係唔會走堂既,就係咁迫我無啦啦受了次心靈重創喇... (如果沒有以下事故的話,我應該可以成功學懂游水添... )
就是因為多年的童年陰影,第一堂我便用了比其他同學更久的時間去浮水,正當有少少成績之際,我只不過忍不住的歡呼了一聲,便被老師指責我不守紀律,即時在泳池邊罰企,可憐我臉皮薄兼多年來都是學校的特權份子,實在受不起這樣子的屈辱,結果病了一段日子,連最後一堂都不用去了。忌水的生涯便從此和我形影不離...

還有其他...印象最深刻的,要算中三、四那年無啦啦比其他班的同學當面贈了句 :「紅顏禍水...獲利回吐...」大佬呀,關我鬼事咩,點鬼知有人會同一時間喜歡我咩,知我就晨早彈開九丈遠啦,仲會企係度比你串句我十年後才懂的術語咩 (沒錯,當年天真無邪的我仲夠膽死即時問人點解,佢就扮晒高人咁「你真的很天真啊,遲d你就會明...」現在回想起都不禁爆番句 : 「頂」...可恨到現在還未有人成功發明時光機) ...就算連戀愛,都離不開個水字...唉 ! 但身為黎明粉絲的我,我打死堅持唔會唱「給我一杯忘情水...」我堅持、我堅持、堅持...呵呵。

弊 ! 吹得太多不應吹既水,又係時候煲乾水...

6 則留言:

倉海君 說...

鬼打Brand 1 中學--Band 1

就係咁迫我無啦啦受了次心寧重創喇... (如果沒有以下事故的話,我應該可以成功學懂游水添... )--心靈重創

我最憎游水,雖然中小學都有游泳池,但係我從來都唔游。唔知點解,諗起要同全班幾十人一齊跳落個泳池,我就有種作嘔?感覺。我小學堂堂詐病,中學索性sick leave,考試?話之佢死!

匿名 說...

曾浸倉海難愛水﹐人地都話怕水﹐你還成個海搬入來? 我以為自己喝得少水﹐一日一?兩杯已夠﹐喝一兩口就夠還真未見過﹐難道真係蜥蜴或駱駝轉世? 喝酒我倒能喝七?八支﹐嘻﹐不知是否老化﹐近來好像也喝多了水﹔以前亦試過三個月只用果汁﹐奶和咖啡維持生命﹐適水不沾。

過路貓小姐 說...

Remarks :

1st : 倉海君
2nd : 道士


p.s.
倉海君:
已全部更正,謝 !

林時拉夫斯基 說...

我以前間中學有泳池呀,所以體育堂要游水啦。我本身都鍾意浸水(唔係游水),所以本來都無咩所謂,但弊在有幾年個PE先生都係麻甩佬啦,依家諗起佢o既目光都仲會打冷震~~~

「紅顏禍水...獲利回吐...」係咩術語黎架?我頭先google過,搵唔到~

”展望 : [嚴重警告閣下,本人係十分危險的,極有潛質做恐怖份子,會因小事 (可能係一兩句說話而已) 而突破臨界點繼而失控暴走狂飆。] 本人的偉大夢想係消滅地球,統治全宇宙...呵呵呵...當然這些尚在計劃中 (我每晚躺在床上不能即時入睡前的一分半秒自我陶醉..)”
唔知你有無睇過傻呼嚕同盟寫o既《日本動畫五天王》?你呢段自我簡介有d似佢地o既風格。

另外,今早o係公司睇你個blog,見你《留言紀錄》o個篇o係我個名隔離寫住「我的新寵」,本來諗住等晏d(即依家)留言o個陣講留幾句客套說話,點知頭先一睇,「我的新寵」幾隻字已經無左,估唔到我咁快就失寵,哈,真係知否世事常變~ 
不過你睇完我呢個留言,都唔好為左怕我傷心(?)而加番o個幾隻字落去。依我o既"潛"力,我都係o岩做「我的新塚」多d。

林時拉夫斯基 說...

嘩,你個部落o既保安咁森嚴o既?我打錯左野,想鏟番個留言再post過都鏟唔到~

過路貓小姐 說...

呵呵...林妹妹 (我估你應該比我年少)
好彩當年我們的校長夠「古叔」,他堅持女生和男生分開上PE堂之餘,仲分男生亞sir 教,女生miss 教以免卻此等童年陰影...^^

至於「紅顏禍水...獲利回吐...」之後句野呢..oh sorry..中間係有一大段古,但不便在此公開。簡單點說我只是對他的一大段對白中,這兩個四字成語印象最深,其中「獲利回吐」原來係和股票有關的,只是他借用黎0趙我(我仲要10年後先明,冇仇報咁先慘吖ma..><")

well,動漫都係我既嗜好之一..但《日本動畫五天王》...我未聽過喎,你有份參與的嗎 ? 香港的還是台灣的 ? 好看嗎 ? 畫功如何 ? 有機會都去 look look 先..^^

另外,我要為我的無心之失道歉: 「oh..very sorry ar,林妹妹我冇意傷你的心啊~~」你並沒有失寵啊,只是我係在鎗林彈雨中冒死update 個blog時,我老細突然出現,就係咁,尚未完成的文章就比你發現了...><"..不過你放心,你仍然係本大爺我的愛妃..呵呵,真係要怪罪既,你就怪倉海君啦,都係佢害我要更正內裡不實的資料,而引起今次的禍端。(吼..><")

最後,保安咁森嚴呢個問題呢...呵呵..都係意外,我其實係好少用blogger.com 架,通常係用 msn, so 不太熟悉它的 function,我見button 就篤架啦,咩都試下咁law,不過咁都好既,我識太多滋事破壞「粉子」,保安嚴密d,可以防止他們污染我的淨土..(我都係參考拉丹的防反恐工作咋!)呵呵呵..^o^

p.s. 我唔覺你有打錯野喎..?!